Սիրելի՛ այցելու,
Բարի գալուստ «Լիարժեք կյանք» ներառական հասարակության խթանման հասարակական կազմակերպության պաշտոնական կայք։

Գրեթե երեք տասնամյակ մենք հետևողականորեն աշխատում ենք՝ կառուցելով մի հասարակություն, որտեղ բոլոր մարդիկ, անկախ իրենց ֆիզիկական, մտավոր, կրոնական, ռասայական պատկանելությունից և այլ հատկանիշներից, ունեն հավասար իրավունքներ և հնարավորություններ:

Մեր կազմակերպությունը հիմնադրվել է որպես քաղաքացիական նախաձեռնություն և ղեկավարվում է հաշմանդամություն ունեցող անձանց կողմից։ Այս սկզբունքային մոտեցումը հնարավորություն է տալիս մեզ լինել առավել զգայուն, պատասխանատու և արդյունավետ մեր գործունեության բոլոր ոլորտներում։

Անցած տարիների ընթացքում «Լիարժեք կյանք» ՀԿ-ն իրականացրել է ավելի քան հարյուր ծրագրեր և նախաձեռնություններ, որոնք նպաստել են հանրային կյանքի ներառականությանն ու բարելավմանը։ Այս ամենը հնարավոր չէր լինի առանց մեր նվիրված թիմի, մեր կամավորների, գործընկերների և նվիրատուների համատեղ ջանքերի։ Նրանք այն հենասյուներն են, որոնք մեզ թույլ են տալիս առաջ գնալ և ստեղծել հասարակություն, որտեղ ամեն անձ արժանի է լիարժեք կյանքին։

Մենք շարունակելու ենք մեր ջանքերը՝ առաջնորդվելով ՄԱԿ-ի «Հաշմանդամություն ունեցող անձանց իրավունքների մասին» կոնվենցիայի սկզբունքներով և իրավունքների վրա հիմնված մոտեցմամբ։ Մենք հավատում ենք, որ մեր գործը կարևոր է ոչ միայն այսօրվա, այլև վաղվա հասարակության համար։

Շնորհակալ եմ բոլոր նրանց, ովքեր մեզ հետ են եղել այս ճանապարհին և շարունակում են աջակցել ներառական հասարակության ձևավորմանը։

Սուրեն Մաղաքյան
Հիմնադիր նախագահ